الخصر النحيلي

عميلك ضاق عقبك يازميلي=ظليله شمس وشموسه ظليلي
يرود اللال في صحرا الضوامي=عقب وسمي السحب أبطى محيلي
خصيم الصدق ما تشكي شروره=يلوث يلوث في دربن طويلي
على جهله نسى سكة مسيره=وتالي طاح من مابه عطيلي
هتوف الودق ينعشني هميله=يذكّرني بشعرٍ لك هميلي
إذا منه طرالي حين غفله=يفجّ الصوع بي من ويج ويلي
عشقت الشعر من هيبة حروفك=ومن جيلك بدى بالنظم جيلي
عسى مانتبع ضْعاف المثايل=وانا تلميذك ولرضى الهزيلي
زميلي والشهم تبهج علومه=زميلي والدني يبقى ذليلي
فتوق الياش مجهوله طبوبه=فما بالك بمن فينا يعيلي.؟!
يدسّ الحقد في نفس الجهالا=ويبثّ الشرّ في نفس الأصيلي
أنا ياصاحبي غادرت داري=أبا أرضٍ بها روح الجتيلي
وشفت اللي يفوق الوصف وصفه=لبيب العود والخصر النحيلي
ولا لي بدّ من نظرة عيونه=حرابٍ تشبه الحد النصيلي
مجرد شوفته من دون موعد=يطفّي واهيّ النفس الشعيلي
شعيل النفس من فرقى ضناها=شميمي والنعم قرمٍ قبيلي
خلف طبعه على طبعي وتغيّر=بعد ما كنت في روحه نزيلي
تغيّر دون زلّه من جدانا=وغره سعد وقته يا زميلي
عسى يدرك مع الايام قدري=إذا ما كان له همّه حصيلي
قبل لا يندثر حبّه فقلبي=وغيره من عقب هجره يخيلي
مثل ما قال راعي الوصف الاوّل=(تبدّل بي وانا بلقي بديلي)
أشوف الصبح قرّب والسموحه=مقالي ساقني أشكي عضيلي
وانا من عادتي ألجم شعوري=أخفّي واذكر الشيّ القليلي





وسلامتكم... انشالله تنال اعجابكم اخوكم / مغرم الرومانسيه

صح لسانك اخوي مغرم على القصيده

صح بدنك اخوي المفتون ..


وتسلم على الإطلاله الجميله...

صح لسانك اخوي مغرم الرومانسيه



وتسلم ع القصيده

صح بدنك اخوي المجروح ...










وتسلم على المرور