قالوا علوم العود قلت ابشرو به
ماني بخيل في علومي على الغير
الادمي عـدة خطـاه محسوبـه
يومر وينهى في مسيره بتدبيـر
بدبرة حكيم عالـم فـي غيوبـه
وهو الذي بيده زمـام المقاديـر
قمنا من الفيحا سقا الغيث صوبه
عله من الوسمي سحاب مباكير
دار لنا عنـد الجميـع محبوبـه
دار لها قيمه وشهـره وتقديـر
منها نهار السبت والشمس دوبه
نوره تبين فوق روس المقاصير
مرن بريده من شمالـي خبوبـه
الاولات يريـعـن للمواخـيـر
جينا المحير وريعوا وافطرو بـه
ثم عطو بسكة نواظـر معابيـر
مع خبة نبخص مسالك دروبـه
ما بين الاجفر والطعوس المزابير
شامة زرود الواسعة دوجوا بـه
ساعة زمان بين خضر الدواوير
برض كساه من المحاسن عجوبه
سبحان من سواه باحسن تصاوير
لا حرك الحاجر نسايـم هبوبـه
غب الندى زادت جماله بتعطيـر
يشتاق له من كان نفسه تروبـه
متخالط نبتـه خزامـا وسنيـر
سرنا منه والدرب ما به صعوبه
يم تربه ثم عطفوهـن محاديـر
قالوا معشا قدم حـزة غروبـه
وقت هل البيدا يسمونه عصيـر
شبوا هل العـادات نـار لهوبـه
كنه ينادي مرحبـا يـا مساييـر
قـدام لا تظهـر بـوادر كذوبـه
نادا المنادي ورحبوا يا مناعيـر
وسلامت عمركم..
__________________
***